Á dögum samkomubanns er ekki mikið að frétta af starfi knattspyrnudeildar Leiknis, frekar en starfi annarra deilda eða félaga.
Engar æfingar, engir leikir og við höldum að okkur höndum í undirbúningi tímabils sem enginn veit hvenær byrjar eða hvernig verður.
Leikmenn meistaraflokks æfa þó af kappi einir sér eða í smærri hópum eins og Spaugstofan orðaði það. Veðrið hefur auðvitað leikið við okkur síðustu vikur og auðveldað mönnum lífið og útihlaupin.
Þau tíðindi hafa þó orðið í leikmannamálum að Tom Zurga er farinn heim til Slóveníu og mun ekki leika með félaginu í sumar.
Starfsmenn sveitarfélagsins eru á fullu í að undirbúa grasskipti í Höllinni og beinast bænir ritara þessa pistils mjög að því að takist að hefja og helst ljúka því verki í samkomubanninu.
Ekki tókst að ljúka aðalfundi knattspyrnudeildar fyrir samkomubann og er ársreikningur síðasta árs birtur hér á síðunni í dag með fyrirvara um samþykki aðalfundar.
Gamla grasið.....